CEBU – Gitambagan ni Cebu City Councilor Philip Zafra, chairman sa Committee on Peace and Order, ang katawhan nga planohon ug insakto ang pagbisita sa mga sam-ang arun nga malikay usab sa mga pagpangawat sulod sa mga panimalay.
Matud pa, kini ang panahon sa pagpanggawas sa mga dautang elemento, hinungdan nga kung mubisita man gani sa mga sam-ang, gikinahanglan nga adunay mahabilin nga mubantay sa panimalay ug kung walay mahabilin, importante nga sirad-an ug i-lock ang mga pultahan ug mahimo usab nga itugon na lang kini sa silingan.
Gidugang pa niini nga kung anaa sulod sa sam-ang, giingong dili mag-post ug “realtime pictures” sa social media arun nga dili mabantayan sa mga kawatan nga walay tawo ang panimalay ug maghatag kanila ug higayon sa pagpangawat.
Gitino sa konsehal nga hugot usab ang ilahang pakig-alayon sa kapulisan, intelligence armed ug CENTCOM arun nga masayran kung ugaling adunay hulga sa seguridad.
Samtang, giawhag usab ni Zafra ang katawhan nga magsul-ob sa gihapon ug facemask tungod kay sigurado nga magsikit gayud ang mga tawo sulod sa mga sam-ang, kini bisan pa man nga opsyonal na ang pagsul-ob niini.
