Dako ang kabalaka nga gipadayag karon sa Commission on Higher Education (CHED) kabahin sa padayon nga kawalay trabaho ug dili pagtugma sa kahanas sa mga fresh graduates nga adunay panginahanglan sa industriya.
Atol sa gipahigayon nga seminar diin gipangulohan ni CHED Chairperson Dr. Shirley Agrupis, dili kini angay nga baliwalaon hilabi na nga basi sa datos sa Department of Labor and Employment (DOLE), 3,364 lamang sa 25,876 ka mga nangitag trabaho ang gidawat sa mga job fair niadtong Enero 2025.
Matod sa CHED, daghang mga gradwado ang anaa sa ubos nga lebel nga trabaho nga wala magkinahanglan og degree, samtang ang mga industriya kulang pa sa mga skilled workers.
Bisan kung gamay ang underemployment basi sa datos gikan sa Philippine Statistics Authority (PSA), si Agrupis niingon nga kini nagpakita sa mas lawom nga problema sa istruktura sa labor market.
Tungod niini, gipasiugda karon sa CHED ang mga reporma aron mahimong mas moderno ug makiangayon ang sistema sa edukasyon sa nasud.
