Gibarugan sa China nga espiya ang tulo ka dinakpan nga mga Filipino.
Matod sa tigpamaba sa China Foreign Ministry nga si Lin Jian, nga ang mga awtoridad sa China kay nagpagawas og detalyadong impormasyon sa mga kalihokan sa espionage page nga giingong gihimo sa maong mga Filipino sa China.
Gitataw usab sa opisyal sa China nga ang hudisyal ug hingtungdan nga awtoridad adunay kaso batok sa 3 ka mga Filipino basi sa kamatuoran ug subay sa balaod.
Sa press conference, gipasanginlan ni Lin ang Pilipinas nga giingong nag-imbento og sunodsunod nga mga kaso sa gitawag og Chinese spy cases pinaagi sa iyang giingon nga “stigmatization and politicization” base sa presumption of guilt nga walay klarong ebidensiya.
Kini maoy hugot nilang gisupak ug makapila na ka higayon nga nipasaka og protesta batok sa PH.
Gipasalig sa Chinese official nga hugot nga husayon ang kaso sa 3 ka Filipino subay sa balaod ug protektahan ang ilang legal nga katungod ug interes nunot sa panawagan sa gobyerno sa Pilipinas ngadto sa China nga protektahan ang ilang katungod ug hatagan sila og due process.
Sa habig sa Pilipinas, unang gipanghimakak sa National Security Council (NSC) ang akusasyon sa China batok sa 3 ka dinakpan nga mga Filipino.
Matud pa sa tigpamaba sa NSC nga si Assistant Director-General Jonathan Malaya, ang mga dinakpan nga mga Filipino kay ordinaryo nga Filipino citizen nga walay military training.
