Midepensa sa gibuhat nga water cannon shelling ang Chinese Embassy nga nakabase sa Manila sa usa ka barko sa Pilipinas nga nahitabo niadtong Miyerkules, Mayo 21, 2025.
Gitataw sa embahada nga ang mga barko sa Pilipinas giingong nakasulod sa kasikbit nga kadagatan sa palibot sa Chinese reef nga walay pagtugot.
Tungod niini, ang habig sa China mihimo sa ilang giinong tukmang mga lakang sa pagpatuman sa balaod agig tubag sa panghitabo.
Gisaway usab niini ang pagkondenar sa mga nasud sa insidente ug giawhag ang mga embahada sa ubang mga nasud nga susihon ang mga kamatuoran sa dili pa kuno magkomento sa social media.
Apan, base sa mga pamahayag nga giluwatan sa mga Ambassadors sa ubang nasod nga nagbase sa Manila, ang United Nations Convention on the Law of the Sea (UNCLOS) ug ang 2016 arbitral ruling nga nag-invalidate sa halapad nga pag-angkon sa China sa gilalisan nga katubigan maoy gibasehan niini.
Apil na niini ang West Philippine Sea, nga naglangkob sa isla sa Pag-asa Islands ug palibot sa Sandy Cays, apil na diin nahitabo ang pinakaulahing harassment sa China sa usa ka barko sa PH.
Sa laing bahin, sumala sa National Maritime Council (NMC), ang gobyerno sa Pilipinas nakatakdang mohimog tukmang diplomatikong mga aksyon, ingon man ang multilateral nga kooperasyon ug maritime-capacity building aron maseguro ang kaluwasan ug pagka-epektibo sa mga operasyong maritime sa Pilipinas.
