Nasikop pinaagi sa search warrant nga gisilbi sa usa ka leisure park sa dakbayan sa Clark niadtong Hulyo 27 ang Chinese national nga giingong manager sa gironda nga Philippine Offshore Gaming Operator hub sa Porac, Pampanga.
Matod sa hepe sa Philippine National Police – Criminal Investigation and Detection Group (CIDG) nga si Police Major General Leo Francisco, ang pagronda sa nasangpit nga leisure park miresulta usab sa pagkakompiska sa 14 ka safety vault sa 5 ka mga villa nga ilang gipangita.
Matod niya nga kasamtangang giimbestigahan ang maong Chinese national ug gi-turn over na kini sa Presidential Anti-Organized Crime Commission aron sukitsukit.
Gibutyag usab ni Major Francisco nga ang dinakpan nga Chinese usa sa mga big boss sa POGO hub sa Porac. Dugang mga personalidad nga nalambigit sa ilegal nga POGO sa Porac ug Bamban, Tarlac ang giimbestigahan usab.
Kasong human trafficking, physical injury, ug kalapasan sa Access Devices Regulation Act ang ipasaka batok sa dinakpan nga suspek.
Gianunsyo usab sa opisyal sa PNP-CIDG nga human sa gihingusgan nga pagsumpo sa mga POGO nga nalambigit sa ilegal nga kalihokan, nibalhin na kuno ang mga sad-an sa ginagmay nga operasyon.
Kahinumduman nga niadtong Marso 2024, kapin sa 800 ka mga Pilipino ug langyaw ang naluwas sa gipahigayong raid sa POGO hub sa Bamban, Tarlac nga nalambigit sa ilegal nga kalihokan sama sa crypto ug love scam.
Usab, ang pagpangita nga gihimo sa mga awtoridad sa POGO hub sa Porac miresulta sa pagluwas sa kapin sa 100 ka mga langyaw diin nadiskobrehan usab ang ebidensya sa torture ug kidnapping.
