CENTRAL VISAYAS-Gipangita sa mga tigpatuman sa balaod sa National Bureau of Investigation (NBI) ang duha ka Chinese national nga namaligya og smuggled, second-hand nga sinina o ukay-ukay.
Sa pakighinabi sa Bombo News team kang NBI-Cebdo agent-in-charge Arnel Pura, gitino niini nga nakadawat sila og mga reklamo gikan sa mga lokal nga tindahan sa sinina, nga giingong adunay usa ka ukay-ukay nga ilegal nga nag-operate online.
Matud ni Pura, nga ang ngalan sa tindahan mao ang LXZ Cebu Ukay Ukay, nga namaligya og mga hugpong sa mga gamit nga sinina pinaagi sa social media.
Human sa mga semana nga gihimo ang case build-up, nakit-an sa mga ahente ang bodega sa establisemento sa Brgy. Tawason, dakbayan sa Mandaue.
Dugang pa, nga basi sa duha ka men’s shirts ug women’s trousers nga ilang napalit atol sa test-buy, ilang nasuta nga ang maong mga sanina gipalusot sa nasud gikan sa China ug Korea.
Kini maoy nakaaghat kanila sa pag-implementar og raid pinaagi sa laing test-buy niadtong Hunyo 6 diin nakapalit sila og 12 ka balot sa used clothing nga nagkantidad og P35,100.
Sa maong operasyon, ilang gidakop ang usa ka Audrey Pepino, usa sa mga custodian sa tindahan ug maoy naghatod sa mga bale sa mga ahente nga gitagoan.
Sa pagkakaron anaa siya sa kustodiya sa NBI-Cebdo.
Samtang, si Pura niingon nga ilang giila ang mga tag-iya sa tindahan sa ukay-ukay nga sila mga Chinese national nga sila si Stephen So ug Junya Tan.
Sila si So ug Tan nagpabiling gawasnon samtang ang NBI-Cebdo nagpahigayon og dugang imbestigasyon sa maong insidente.
Mahimong mag-atubang ang mga suspek og mga kaso sa paglapas sa Republic Act No. 4653, ang balaod nga nagdili sa komersyal nga pag-import ug pagbaligya sa mga gamit nga sinina kalabot sa Cybercrime Prevention Act of 2012 (RA 10175).
