CEBU CITY-Gikondenar sa Commission On Human Rights (CHR-7) ang pagkamatay ni former Medellin Mayor Ricardo “Ricky” Ramirez kinsang gisulod sa iyang lawak sa Bogo-Medellin Corporation Medical Center samtang nakahospital arrest.
Kini ang pamahayag sa director sa CHR-7 nga si Atty. Arvin Udron sa dihang nahinabi sa Bombo Radyo Cebu.
Matud ni Udron nga tungod kay 15 ka mga tao ang suspect sa pagpatay ug adbokasiya sa CHR-7 ang pagpreserba sa kinabuhi, hinungdan nga nagpagawas sila og statement nga ila kining gikondenar.
Nanawagan usab kini karon sa kapulisan nga pangulohan gyud ang imbestigasyon sa nahitabo sa former mayor ug incumbent councilor para matino ang tinood nga mamumuno.
Samtang magmonitor usab matud pa ang CHR-7 sa dagan sa imbestigasyon niini.
Sa pagkakaron, blangko sa gihapon ang kapulisan sa motibo sa pagpatay sanglit wala pa silay nakuha nga konkretong detalye gikan sa witness ug wala usab CCTV camera ang naasoy nga hospital.
Nanawagan karon ang Medellin PNP sa mga dunay kasayuran ug nakakita sa panghitabo nga mupatim-aw ug mudangop sa ilang estasyon para mapaspasan ang pagsulbad sa kaso.
