Nagpahigayon og panagtigom ang mga sakop sa Coastal Law Enforcement Alliance – Central Visayas (CLEAR-7) kagahapong adlawa sa Biyernes, Abril 4, 2025 nga may kalabot sa pagprotektar sa kalikopan lakip na ang hisgutanang pagkonserba sa Blue Swimming Crab sa rehiyon.
Sa maong panagpulong, gipaambit sa mga member-agencies sa Bureau of Fisheries and Aquatic Resources (BFAR), PH Coast Guard, ug Department of Environment and Natural Resources (DENR) sa kalampusan niini sa ilang mga aksyon og ang hisgutanan sa dugang pang pagabuhatan sa pagkonserbar sa kadagatan sa rehiyon.
Gipangulohan kini nila Coast Guard District Central Visayas Deputy Commander Captain Adonis P. Añasco ug BFAR-7 Regional Director Mario N. Ruinata.
Usa sa mga gituki nila ang direktiba nag-establisar og mga regulasyon alang sa pagkonserbar sa ‘Blue Swimming Crab’ ug nagtakda sa mga fishing gear restrictions aron malikayan ang overfishing subay sa Joint Administrative Order No. 01.
Kini nagmando sa mga Local Government Units (LGUs) sa padayon nga pagparehistro sa mga mananagat ubos sa crab fisheries sector ug pagpatuman sa mga gitakda nga penalties sa mga milapas sa maong polisiya.
Ang mga LGUs, sa konsultasyon sa Fisheries and Aquatic Resources Management Council (FARMC), magtakda og closed season ug mga lugar nga limitado ang pangingisda aron maprotektahan ang species nga giilang anaa sa critikal population.
Gikinahanglan usab sa mga LGUs ang pag-update ug pagmantinir sa tukmang listahan sa mga municipal crab fishers aron masiguro ang husto nga pagmonitor ug malungtarong pagdumala.
