Gipahayag ni Tingog Partylist Representative Jude Acidre sa usa ka pakighinabi sa Bombo Radyo Cebu bahin sa mga nag-unang panghitabo ug proseso sa impeachment proceedings.
Sa maong pakighinabi, giklaro ni Acidre nga human sa testimonya sa unang saksi ubos sa Article 1 nga si Atty. Roderick Wamil, ang mosunod nga saksi mao ang COA Auditor nga si Xylene Mae Del Campo, ug gilauman nga maghatag og klarong konteksto sa pagbalhin o pagka-reassign sa mga COA officers ug sa dugang nga mga detalye bahin sa mga sumusunod nga paggawas ug pag-encash sa pondo.
Gibutyag usab niya nga ang hinungdan sa pagkalangan sa hearing sa miaging adlaw mao ang pag-insistir sa defense team nga usisaon ug i-scan sa tagsa-tagsa ang mga Acknowledgment Receipts (ARs) aron itandi kini sa mga nota sa saksi.
Dugang pa ni Acidre, nagpakita og kaandam ang prosecution nga gamiton na lamang ang mga dokumento sa defense tungod kay ang tanang resibo ug dokumento naggikan man sa parehong mga opisina sama sa Office of the Vice President (OVP) ug Department of Education (DepEd).
Samtang kabahin sa pagtugot ni Presiding Judge Francis “Chiz” Escudero sa hangyo sa prosecution nga mogamit og judicial notice sa mga affidavit ug mga nahimong imbestigasyon sa House Committee on Good Governance ug Committee on Justice, gipahayag ni Acidre nga gitahod niya ang hurisdiksyon ug desisyon sa presiding officer.
Apan, gipatin-aw niya nga mas maayo gihapon nga ang mga saksi personal nga mopadayag sa ilang tibuok ug komprehensibong testimonya sa mismo nga impeachment court.
Sumala ni Acidre, lahi ang kinaiya ug katuyoan sa imbestigasyon nga gihimo sa Kamara kumpara sa pormal nga hudisyal nga proseso sa impeachment court.
Pinaagi sa direktang pagpahigayon sa tibuok testimonya sa korte, mas mahatagan og sakto ug bug-os nga konteksto ang kaso, nga makatabang pag-ayo sa mga senator-judges sa ilang pagdesisyon ug sa publiko sa pagprender sa tibuok kamatuoran.
