Gi-flag sa Commission on Audit (COA) ang kapin P14-milyones nga wala mabayari nga foreign travel expenses sa Office of the President (OP) para sa pipila ka mga opisyal niini niadtong 2024.
Sumala sa COA 2024 annual audit report, ang komisyon mitaho nga ang OP kay wala pa naka-recover sa P14,403,827.63 nga plete sa eroplano ug gastuhon sa hotel nga gibayaran on behalf sa mga opisyal sa gobyerno kinsa miuban ni Presidente Ferdinand “Bongbong” Marcos Jr. sa mga byahe niini sa gawas sa nasud sugod kaniadtong 2022.
Ang outstanding receivables nag-cover sa official visits sa mga nasud nga China, Japan, Vietnam, Indonesia, Cambodia, Malaysia, the Czech Republic, Germany, Belgium, Switzerland, ug Estados Unidos.
Dugang sa COA nga pipila ka mga accounts kay overdue na samtang ang uban kay pending ang status sulod sa kapin duha ka tuig.
Gihimug-atan niini nga ang OP kay miisyu na sa billings sa higayong ang invoices kay madawat apam dili kini magpadala og follow-up demands human maupos ang 30-day payment period.
Giawhag sa mga auditor sa COA nga paghugtan sa OP ang pagpanukot niini samtang ang OP mipahibalo nga nagsumiter na sila og demand letters sa mga debtor-agencies niadtong Abril 2025.
