Mikanaog na sa katungdanan isip Commission on Elections Central Visayas Regional Director si Lionel Castillano aron mahimong bag-ong direktor sa bag-ong natukod nga Comelec Negros Island Region (NIR) nga muserbisyo sa mga probinsya sa Negros Occidental, Negros Oriental ug Siquijor.
Mahimong epektibo ang iyang reassignment sugod Hulyo 1, 2024.
Matod pa sa tigpamaba sa Comelec Cebu Province nga si Omar Sharif Mamalinta nga ang bag-ong Comelec Central Visayas Regional Director mao si Atty. Francisco Pobe, kinsa maoy kasamtangang direktor sa Comelec CARAGA.
Kahinumduman nga niadtong Hunyo 13, gipirmahan ni Presidente Ferdinand Marcos Jr. ang NIR, nga magbutang sa Negros Oriental ug Siquijor sa samang rehiyon sa Negros Occidental gikan sa Kasadpang Visayas.
Kining maong kausaban nagpasabot nga ang Bohol ug Cebu na lang ang magpabilin isip probinsiya sa Central Visayas.
Apil usab niini ang highly urbanized nga mga dakbayan sa Cebu City, Mandaue City, ug Lapu-Lapu City.
