CEBU CITY — Miabot na sa 190 ang ihap sa mga natakdan sa coronavirus disease o COVID-19 sa Central Visayas, human nga nadugangan og laing tulo ka mga nagpositibo niini.
Base sa latest report gikan sa Department of Health (DOH)-7, nagagikan ang duha niini sa dakbayan sa Sugbo samtang usa ang gikan sa Lapu-Lapu City.
Gikumpirmar ni Cebu City Mayor Edgardo Labella nga natala ang laing pasyente gikan sa Barangay Mambaling ug sa Katipunan, Labangon maong niabot na sa 165 ang confirmed cases sa dakbayan.
Nagpabilin sa unom ang COVID-19 cases sa Mandaue City ug anaa karon sa 11 ang dakbayan sa Lapu-lapu.
Ug walay natalang pagsaka sa mga kaso sa maong sakit sa lalawigan sa Sugbo, Bohol, Negros Oriental, ug Siquijor.
Samtang nadugangan og usa ang namatay sa maong sakit kinsang usa ka pasyente gikan sa Brgy. Mambaling, sa dakbayan sa Sugbo.
Anaa na karon sa siyam ang death toll sa rehiyon ug nagpabilin sa 23 ang nagnegatibo sa coronavirus ug nangaayo.
Mihangyo karon si DOH-7 Director Dr. Jaime Bernadas sa katawhan nga mahimong “home liners” diin magpuyo gayud sa sulod sa panimalay aron makalikay sa makalilisang nga virus.
