Nakit-an sa mga otoridad ang nagkadunot nga lawas sa duha ka 7-anyos nga batang lalaki nga unang nareport nga nawala, sulod sa usa ka sakyanan nga naka-park sa Lara’s Garage sa Sambag, Barangay Tuyan, sa dakbayan sa Naga, niadtong Mayo 20, 2026, ala 1:30 sa hapon.
Giila ang mga biktima nga sila si Remart Conag ug Jeff Xian Abellar, nga pulos lumad nga residente sa Sitio Tapon sa maong barangay.
Matod sa imbestigasyon, personal nga nidugok sa buhatan sa kapulisan ang mga ginikanan sa mga biktima niadtong hapon sa Mayo 19 aron i-report nga wala na makapauli ang ilang mga anak sukad pa niadtong alas 3:00 sa hapon sa Mayo 18 human kini nigawas aron magdula.
Tungod niini, daling nihimo og search operation ang mga Intel operatives sa City of Naga Police Station aron pangitaon ang mga minor de edad.
Sa eksklusibong pakighinabi sa Bombo Radyo Cebu kang Pcapt. Carlos Narca, Naga City Police Office, iyang gikabutyag nga sa pagsusi sa mga otoridad sa mga CCTV footage sa maong dapit, didto nakit-an nga nisulod ang duha ka bata sa garahe nga gipanag-iya sa pamilyang Lara.
Sa dihang gisusi sa mga operatiba ang maong dapit, nakabantay sila og daut nga baho nga nagagikan sa usa ka nag-parking nga Kia Picanto sedan, ug sa mas lawom nga inspeksyon, didto na tumong nga nadiskubrehan ang wala nay kinabuhi ug nagkadunot nga lawas sa mga bata sa sulod sa maong sakyanan.
Sa pagkakaron, gipaubos na sa pagsusi sa Scene of the Crime Operatives (SOCO) ang dapit ug nagpadayon pa ang lawom nga imbestigasyon sa maong kaso ubos ni IOC PSMS Jake S. Catane aron masuta ang tinuod nga hinungdan sa trahedya.
