CEBU CITY — Plano karon sa Cebu Provincial Police Office (CPPO) nga mo-umol og task force aron bantayan ang mga nag-unang tourist destinations sa probinsya sa Sugbo taliwa sa COVID-19 pandemic.
Matud ni CPPO Director Col. Alladin Collado nga kinahanglang bantayan ang mga destinasyon sa probinsya human nikatap sa social media ang hulagway diin nakalapas sa health protocols ang mga nibisita sa Bantayan Island.
Nagkuwang sila og mga sakop sa pagkakaron gumikan lang sa mandatory schooling sa mga kapulisan.
Hinungdan nga tuyong itukod ni Collado ang Task Force diin ang mga volunteers isip force multipliers nga maoy mobantay ug mobadlong sa mga nagmalapason sa protocols.
Kini aron matabangan usab ang mga indibidwal kinsang nawad-an og panginabuhi-an tungod sa COVID-19 pandemic.
Makigkita una si Collado sa mga mayor sa kalungsuran aron sayron kung aduna bay problema sama lang sa pagdasok sa mga nag-unang destinasyon sa probinsya sa Sugbo.
