CEBU PROVINCE-Ibutang sa full-alert ang tanang police stations sa lalawigan sa Sugbo sugod karung adlawa Agosto 26, 2023, kini isip kabahin sa security protocols alang sa Pasigarbo sa Sugbo festival sa Carcar City, habagatang Sugbo karong Domingo, Agosto 27.
Gitino sa Cebu Police Provincial Office (CPPO) nga ilibkas ra ang full alert status human sa kalihukan.
Matud ni Police Major Nolan Tagsip, ang tigpamaba sa CPPO officer-in-charge nga si Police Colonel Noel Flores, nga isaka na sa Cebu Police Provincial Office ang ilang alert status gikan sa normal ngadto sa full alert nga nagpasabot nga ang tanang police station sa lalawigan sa Sugbo wala nay gitugotan nga maka leave ug kinahanglan nga naa lang kini sa ilang buhatan.
Nasayran, nga mokabat sa 2,000 ka personnel gikan sa Philippine National Police, Armed Forces of the Philippines, Philippine Navy, Philippine Coast Guard, National Bureau of Investigation, Philippine Drug Enforcement Agency 7, Land Transportation Office, Land Transportation Franchising and Regulatory Board (LTFRB 7) ug Carcar City Hall ipakatap sa adlaw sa Pasigarbo sa Sugbo.
Dugang ni Tagsip nga giplano na ang tanan nga angay buhaton lakip na ang final security briefing sa mga supervisor sa matag law enforcement agency.
Usa sa gihugonhugon nga motambong sa maong kalihukan mao si Presidente Ferdinand Bongbong Marcos Jr., apan wa pa kini makompirmar sa kapolisan.
