CEBU – Nakatala ang Cebu Police Provincial Office (CPPO) og pagkunhod sa mga insidente sa krimen sa lalawigan sa panahon sa Oktubre 31 hangtod Nobyembre 6, 2022.
Kung diin ang rekord sa CPPO nagpakita nga 191 ka insidente sa krimen ning panahona, nga mas ubos kon itandi sa 286 nga ilang natala gikan Oktubre 24 hangtod 30, 2022.
Apan si CPPO director, Police Colonel Rommel Ochave, niingon nga ilang gipaabot ang traffic-related nga mga insidente karong umaabot nga holiday season tungod kay ilang gipaabot nga mas daghan ang mogawas alang sa holiday rush.
Tungod niini, si Ochave niingon nga nakig-alayon na sila sa Highway Patrol Group (HPG-7) ug sa mga local government units aron hingusgan ang pagpatuman sa mga lagda sa trapiko.
Nakig-alayon usab sila sa Land Transportation Office sa rehiyon (LTO-7) alang sa pagpahigayon sa pagbansay-bansay sa mga lagda sa trapiko alang sa mga personahe sa kapolisan ug uban usab sa mga traffic enforcer sa pag-edukar sa publiko sa kasamtangang lagda sa trapiko.
