CENTRAL VISAYAS-Nikunhod ang natala ang kriminalidad o crime rate sa rehiyon sa Central Visayas sukad niadtong buwan sa Enero hangtud sa Agosto ning kasamtangang tuig.
Gibutyag kini atol sa panagtigom sa Regional Peace and Order Council – Central Visayas (RPOC-7) niadtong Huwebes, Septiyembre 19, 2024.
Matod pa sa datus nga giluwat, gikan sa 2,635 sa mga crime incidents sa samang panahon sa tuig 2023, niabot nalang 2,368 sa kasamtangnang tuig nga adunay pagkunhod sa 10%.
Gipresentar ang maong datus ni Police Colonel Ireneo Dalogdog, ang pangu sa PRO-7 Regional Investigation and Detective Management Division (RIDMD) sa tigom sa pagpangu ni RPOC-7 Chairman Lapu-Lapu City Mayor Junard “Ahong” Chan nga naglangkob sa walo ka mga dagkong kasong sama sa murder, homicide, rape, robbery, theft, physical injury, motorcycle theft, and carnapping.
Ang report naglangkob sa datus gikan sa Cebu City Police Office (CCPO), Cebu Provincial Police Office (CPPO), Mandaue City Police Office (MCPO), Lapu-Lapu City Police Office (LLCPO), Siquijor Provincial Police Office (SPPO), Bohol Provincial Police Office (BPPO), ug Negros Oriental Provincial Police Office (NOPPO).
Ang third-quarter RPOC meeting gitapos uban sa nagkalain-laing ahensya sa gobyerno nga nagtaho ngadto kang Chair Chan ug ubang mga sakop sa konseho. Ang sunod nga miting sa RPOC gikatakda sa Disyembre 12, 2024.
