CEBU CITY-Mikabat sa P1.9 milyones nga balor sa peke nga sigarilyo ang nasakmit sa mga sakop sa Criminal Investigation and Detection Group (CIDG) Mandaue City Field Unit gikan sa SYH Wholesale and Retail store sa dalan MC Briones,Barangay Ermita, dakbayan sa Sugbo alas 6:45 sa gabii. niadtong Martes, Hunyo 20, 2023.
Giila ang tag-iya sa tindahan nga usa ka Chinese national nga si Allen Lim, 40, nasikop sa mga otoridad, samtang nakaikyas ang iyang kauban nga si Marilyn Lim.
Kauban ang mga personahe sa CIDG ug mga representante sa Bureau of Internal Revenue region 13, Fortune Tobacco Company ug Japan Tobacco International (JTI) atol sa maong raid.
Nasakmit sa maong raid ang siyam ka kahon sa Mighty Green, upat ka kahon sa Mighty Red, tulo ka kahon sa Winston, duha ka kahon sa Marlboro, tulo ka kahon sa Jackpot, 49 ka rim sa Berlin Cigarettes , 49 ka rim sa Astro, 39 ka rim sa New Berlin, usa ka kahon. sa Canon Cigarettes, usa ka kahon sa Union Cigarettes, 21 rims sa Fortune Green ug pipila ka kahon sa ubang mga brand.
Matod ni Police Captain Nigel Sanoy, hepe sa CIDG Mandaue, nga ang ilang operasyon maoy pagpadayon sa malampuson nilang pagpangronda sa dakbayan sa Danao, diin kapin sa tunga sa milyon ka pesos nga balor sa peke nga sigarilyo ang nasakmit sa Barangay Looc niadtong Mayo 30.
Basi sa imbestigasyon ilang nasuta nga dili mamaligya og sigarilyo ang suspensado sa mga tawo nga dili nila kaila.
Dugang pa niya nga ila usab nga naobserbahan nga ang mga selyo sa matag pakete sa Mighty nga sigarilyo adunay parehas nga code, nga nagpasabut nga ang tanan usa ka kopya sa litrato.
Mag-atubang ang mga suspek og kasong kalapasan sa Section 172, 263 ug 265 sa National Internal Revenue Code of 1997, Republic Act 8293 o Intellectual Property Code ug Republic Act 10643 o Graphic Warning Law.
