CEBU – Napanglantawan ang baga nga trapiko karong umaabot nga Dominggo subay sa kalihokan sa IronMan diin pagasalmutan sa 1,900 ka mga partisipante gikan sa 46 ka mga nagkalain-laing nasud.
Lauman nga maggikan sa dakbayan sa Lapu-Lapu ang mga triathlete dayon sa lungsod sa Cordova, mutabok sa Cebu-Cordova Link Expressway (CCLEX) ug paingon sa dakbayan sa Sugbo.
Tungod niini, gi-awhag ni Jonathan “Joy” Tumulak, ang pangu sa City of Talisay – Traffic Operations and Development Authority (CT-TODA), ang mga motorista sa pagplano sa ilahang biyahe ilabi na kadtong mopaingon sa Cebu City.
Matod pa ni Tumulak nga ilahang pagasirad-an ang dalan sa South Road Properties nga manukad sa Eskina Laray nga duol sa usa ka mall.
Gi-awhag niini ang mga motorista nga paingon sa Sugbo nga gamiton ang dalan N. Bacalso apan lauman ang baga nga trapiko gumikan sa pagsirado sa SRP.
