Nag-atubang og mga kasong graft si Ariel Nepomuceno, nga hepe sa Bureau of Customs (BOC), ug si Gerald Glenn Panganiban, nga direktor sa Bureau of Plant Industry (BPI) ug uban pang mga opisyal sa duha ka ahensya.
Kini human sa reklamo nga gisang-at sa Office of the Ombudsman sa usa ka grupo sa mga mag-uuma bahin sa 60 ka adlaw nga pagsuspenso sa importasyon sa regular milled ug well-milled rice.
Base sa reklamo nga gipirmahan ni Federation of Free Farmers (FFF) National Manager Raul Montemayor ug MAGSASAKA Chairperson Argel Joseph Cabatbat, ang maong mga opisyal giingong nakalapas sa mga probisyon ubos sa Anti-Graft and Corrupt Practices Act, nga nakahimo og grave misconduct, gross neglect of duty, ug conduct prejudicial to the best interest of the service batok sa mga respondents.
Sumala sa reklamo, ang mga kargamento sa bugas nga mokabat sa kapin sa 340,000 ka tonelada gitugotan gihapon nga makasulod sa nasud bisan pa sa 60 ka adlaw nga suspensyon, diin 90% niini ang regular ug well-milled nga grado sa bugas nga nasakup sa ban. Matod niini nga ang Memorandum sa BPI ug ang clearance sa mga kargamento sa BOC mao ang mga hinungdan niini.
Niining bahina, gihangyo sa mga nagreklamo ang diha-diha nga pag-isyu og preventive suspension order batok sa mga respondent mga public officer aron mapugngan sila sa paggamit sa ilang mga posisyon aron maimpluwensyahan ang imbestigasyon o usbon ang mga rekord.
