Gipasalig ni Department of Agriculture (DA) Sec. Francisco Tiu Laurel Jr. ang hinanaling tubag sa nagkataas nga inflation sa pagkaon nga 6.1%.
Sa pagbalik-lantaw sa miaging report sa Philippine Statistics Authority (PSA), giingong misaka ang inflation sa pagkaon ngadto sa 6.1% niadtong Abril, nga nakitang naapektuhan sa pagsaka sa presyo sa bugas, mais, isda, ug mga utanon.
Gipasabot sa kalihim nga bisan pa man og adunay igong suplay sa pagkaon ang nasud, ang taas nga presyo sa mga produktong petrolyo nagpataas sa gasto sa transportasyon ug logistik, nga nakaapekto sa presyo sa mga palaliton.
Tungod niini, gibuhi pag-usab sa DA ang mga food lane diin gitangtang ang mga toll fee alang sa mga agri trucker ug gipakunhod usab ang mga port charges.
Ingon man nga gipalapdan sa hepe sa DA ang pagmonitor sa merkado aron malikayan ang sobra nga pagsaka sa presyo, samtang nagpadayon sa pagpasiugda sa mga programa sama sa Benteng Bigas ug Rice-for-All para sa mas barato nga bugas.
Andam usab ang gobyerno sa PH nga ipatuman ang price cap nga P50 kada kilo sa imported nga bugas kung magpadayon ang pagsaka sa presyo.
Sumala sa kalihim, ang DA nagbuhat sa tanan aron makunhuran ug mapahinay ang inflation sa pagkaon, samtang gitabangan ang mga mag-uuma nga madugangan ang ilang produksiyon sa bugas, mais, mga tanom nga taas og bili, ug uban pang mga produkto sa agrikultura.
