Nagpatuman ang Department of Agriculture (DA) og temporaryong pagdili sa pag-import sa buhing hayop ug pipila ka produkto sa hayop gikan sa Greece human makumpirma ang mga kaso sa foot-and-mouth disease (FMD) sa mga binuhing karnero sa Lesvos niadtong miaging bulan.
Ubos sa Department Circular No. 20, gisuspinde usab sa DA ang pag-isyu sa sanitary ug phytosanitary import clearances alang sa mga apektadong produkto ug nagmando og mas istriktong inspeksyon sa tanang pantalan sa nasod.
Lakip sa mga produkto nga apektado sa pagdili ang karne sa skeletal muscle, buhing baboy ug baka, ug wala matambalan nga gatas.
Bisan pa niini, gitugotan gihapon ang pagpasulod sa pipila ka giprosesong produkto nga giisip nga luwas base sa internasyonal nga standards, basta mosunod sa higpit nga kondisyon.
Ang mga kargamento nga naipadala na sa wala pa ipatuman ang circular mahimo gihapon tugutan nga makasulod, basta gihimo o giihaw kini sa wala pa ang Pebrero 28 ug mosunod sa mga giya sa DA.
Kung diin, ang mga kargamento nga dili mosunod sa polisiya kumpiskahon o ipailalom sa angay nga legal nga aksyon.
Matod pa ni Agriculture Secretary Francisco Tiu Laurel Jr., ang circular usa ka hinungdanong lakang aron mapanalipdan ang Pilipinas batok sa posibleng pagkalapad sa sakit.
