Gimando ni sa Kagamhanan sa Carmen ang pagsira sa mga dagkong kadalanan sa karong adlawng Domingo, Enero 25, 2026, ug giawhag ang mga bisita ug residente nga maglakaw atol sa ika-53 nga Sinulog festival sa lungsod.
Giisyu si Carmen Mayor Carlo Villamor ang Executive Order 1 aron isira ang Kamuning St. sa Barangay Poblacion ug P. Gecain St. sa Dawis Norte diin walay mga sakyanan nga tugutan nga mosulod gikan alas 9 sa buntag hangtod alas 9 sa gabii.
Sigon sa mayor nga usa ka estrikto nga polisiya sa no-parking ang ipatuman sa mga nasudnong dalan gikan sa Dawis Norte hangtod sa Luyang, ingon man sa mga dalan sa McKinley, Magallanes ug J. Climaco, ug sa Cogon West. Ang mga malapason ipaubos dayon sa clamping.
Tumong sa maong lakang aron masiguro ang kaluwasan sa publiko ug madumala ang dagan sa trapiko atol sa street dancing ug uban pang mga kasaulugan nga nagpasidungog sa Santo Niño.
Tinguha usab sa kamandoan nga “dasigon ang mga residente ug bisita nga maglakaw padulong ug gikan sa simbahan ug grandstand aron maibanan ang kahuot sa trapiko ug masiguro ang kaluwasan sa publiko atol sa kasaulugan,” matod sa EO.
Gitambagan usab ang mga motorista nga gikan sa lagyong mga lugar nga mogamit sa gitudlo nga mga parkinganansama sa; Carmen Memorial Park, Camara Property, parkinganan sa Cebu Technological University, Shemberg Biotech property, ug Cebu Academy.
Nanghinaot usab si Villamor og kooperasyon sa publiko aron masiguro ang hapsay nga selebrasyon.
