CEBU – Dagko nga mga sanga sa kahoy ug mga basura ang nakuha atol na sa clearing operation nga gipahigayon kagahapong adlawa sa nagkadaiyang kasapaan sa syudad sa Sugbo.
Gibutyag ni Cebu City Councilor Jerry Guardo, ang chairman sa Committee on Infrastructure, nga kini ang ilahang nakita nga rason sa pagbara sa tubig sa mga kasapaan ug nakamugna ug dakong pagbaha sa pipila ka mga lugar sa syudad.
Matud ni Guardo nga posibling gikan kini sa kabukiran ug gibanlas sa low-land areas hinungdan nga mibara kini sa mga kasapaan ug wala na’y kaagi-an ang tubig hinungdan sa pag-awas ug miresulta ug pagbaha.
Gawas sa mga dagkong sanga sa kahoy, nakuha usab nila ang pipila ka tonelada nga basura nga usa sa mga nakitang rason sa pagbaha.
Samtang, gitino sa opisyal nga gibutangan na ug mga ‘barbed wires’ ang entry ug exit points, ingon man nga giguba na ang hagdanan sa Kinalumsan River arun nga dili na makabalik ang mga informal settlers.
