Gikatakdang ipatuman sa dakbayan sa Mandaue ang pagdili sa overnight parking sa tibuok siyudad, nunot sa pag-aprobar sa proposed ordinance amendment sa Mandaue City Traffic Board.
Ang maong sugyot iduso na ngadto sa Konseho sa Dakbayan alang sa kataposang pag-aprobar.
Tumong niini nga tangtangon ang tanang kasamtangang probisyon nga nagtugot sa limitado nga overnight parking sa pipila ka kadalanan ug barangay. Kon maaprobahan na sa Konseho, higpit nga idili ang overnight parking sa tibuok dakbayan, apil na ang mga barangay road.
Matud sa pangulo sa Traffic Enforcement Agency sa dakbayan sa Mandaue, nga si Hyll Retuya nga ang maong lakang gitumong aron matubag ang mga kabalaka sa kaluwasan ug padayon nga mga obstruction sa kadalanan tungod sa mga nakaparada nga mga sakyanan, ilabi na panahon sa kagabhion.
Gipasabot usab ni Retuya nga gikinahanglan ang pag-amendar tungod kay ang pipila ka bahin sa siyudad nitugot kaniadto nga mag-overnight parking.
Matud pa ni Retuya nga usa kini sa mga nag-unang rason sa pagwagtang sa overnight parking, tungod kay makababag kini sa emergency response operations.
Gitumbok usab niini ang mga taho nga daghang mga sakyanan ang gibilin sa tibuok gabii sa mga dapit sama sa R. Colina Street duol sa Pacific Mall sa Barangay Ibabao-Estancia. Matud ni Retuya nga pipila niini nga mga sakyanan iya sa mga residente gikan sa ubang barangay, sama sa Pakna-an ug Labogon.
Makabayad ug P1,000 ang masakpang molapas sa ordinansa ug padayun usab nga ipahigayun ang pagpang clamp sa mga sakyanan hilabina sa panahon sa gabie.
Gihimug-atan ni Retuya nga ang Mandaue City walay on-street pay parking, nga nagpasabot nga bawal gyud ang pagparking sa mga pampublikong dalan.
Samtang, giawhag sa TEAM ang tanang tag-iya og sakyanan nga magtinabangay sa pagpasiugda sa mas luwas nga mga dalan.
