CEBU CITY-Andam na ang dakbayan sa Sugbo nga mobalhin gikan sa red zone o adunay impeksyon ngadto na sa pink o buffer zone o walay impeksyon kabahin sa pagtakod sa sakit sa mga baboy nga African Swine Fever (ASF).
Kini ang gibutyag ni Dr. Jessica Maribojoc, ang labaw sa Cebu City Department of Veterinary Medicine and Fisheries (DVMF), gumikan kay paglambo sa kahimtang niini kabahin sa ASF.
Sa pagkakaron, anaa pa sa red zone ang dakbayan apan mapasigarbohon siya nga bugtong ang mga dakbayan lang sa Sugbo ug sa Lapu-Lapu ang gitugotan nga makapagawas ug makadawat og mga produkto nga ginam-an sa karne sa baboy.
Gani, nakaduso na ang DVMF og aplikasyon ngadto sa Deparment of Agriculture-7 aron sa pag-upgrade sa siyudad ngadto na sa pink zone nga kategoriya.
Ang mga dapit nga anaa sa pink zone mao kadtong walay kaso sa ASF ug magsilbing bangil o sagang batok sa pagkaylap sa ASF bisan kung ang mga tapad niini nga aduna pay ASF.
Gipaambit usab ni Maribojoc, nga wala nay natala nga kaso sa ASF ang dakbayan sa Sugbo sukad sa Nobiyembre sa niaging tuig.
