Padayon karon ang kampanya sa Department of Veterinary Medicine and Fisheries (DVMF) Cebu City sa pagkumpiska sa mga karneng baboy ug lechon nga gipamaligyang walay hustong dokumento ug sertipikasyon.
Hinungdan nga matag buwan, adunay silay makompiskang karne sa baboy ug lechon gumikan kay kuwang-kuwang man sa gikinahanglang dokumento, ilabi na gayud ang meat inspection certificate.
Subay niini, gipasabot ni DVMF Cebu City Head, Dr. Jessica Maribojoc nga ubos sa Meat Inspection Code of the Philippines, gikinahanglan nga ma inspeksyon ug masertipikahan ang tanang mga karne, ug lechon nga ipamaligya ngadto sa publiko.
Dugang usab ni Maribojoc, kung walay ikapresentar nga Meat Inspection Certificate, otomatikong makompiskar sa ilahang opisina.
Gipasiugda usab niya nga ang kakuwangon sa inspection permit, nagpasabot lang kini nga walay kasiguradohan kung ang karne luwas bang ikonsumo sa mga kunsomidor, ug gagikan ba usab kini sa mga legal ug permitadong ihawan.
Samtang, giklaro usab nga alang sa mga meat vendor, gikinahanglan usab nga aduna kini sila gihuptan nga health card, pagsalmot sa mga hygienic handling seminar, aron legal ang ilahang pagpamaligya.
Gawas usab nga gipanglangtawan sa mga inspektor kay dili lamang ang mga permit, gumikan kay lakip usab ang aktwal nga kondisyon sa karne, aron masuta kung dili paba kini daot, ug nagpabiling haom nga ipamaligya sa nagkalain-laing merkado.
