Mikumpirmar ang kagamhanan sa Dakbayan sa Sugbo, pinaagi sa Department of Veterinary Medicine and Fisheries (DVMF), nga ang siyudad nagpabiling walay African Swine Fever (ASF) sukad Oktubre 24, 2024, nga nagpadayon sa limpyo nga rekord niini sukad Septyembre 5, 2024.
Sumala sa pangulo sa Department of Veterinary Medicine and Fisheries kon DVMF nga si Dr. Alice Utlang, ang aktibo nga pagpaniid ug pagmonitor sa ASF sa siyudad walay hunong aron mapanalipdan ang lokal nga mga kahayupan ug ang panginabuhi sa mga nag-alima og baboy.
Sa pinakabag-o nga hugna sa testing, ang surveillance team sa DVMF, nga gipangulohan ni Dr. Gal ug Dr. Galaura, nakakolekta og 11 ka sample gikan sa lain-laing mga monitoring point sa tibuok siyudad. Ang tanan nga mga sample nagnegatibo sa ASF.
Nagpadayon usab ang DVMF sa pag-awhag sa publiko ug mga nanag-iya og baboy nga magpabiling mabinantayon, mosunod sa mga lakang sa biosecurity, ug dayon ireport ang bisan unsang dili kasagaran nga kamatayon o sintomas sa baboy.
Gihimug-atan usab ni Utlang nga mahinungdanon usab nga adunay “pet cemetery” aron malikayan ang kadaot nga susama sa posibleng maka contaminate sa katubigan ug malikayan ang nagkadaiyang sakit nga posibleng mokatap gikan sa mga mananap.
