CEBU – Lantawon sa League of the Cities of the Philippines (LCP) ang internal capability niini aron matabangan ang mga biktima sa linog nga miigo sa nagkadaiyang bahin sa Luzon niadtong Miyerkules sa buntag, Hulyo 27.
Kini ang nahimong pamahayag ni Cebu City Mayor Michael Rama, kinsa bag-ong napili nga presidente sa LCP.
Nagkanayon usab si Rama nga paningkamotan sa kagamhanan sa Siyudad kon unsa ang labing maayong tabang nga mahatag niini ngadto sa mga biktima sa linog.
Sa dihang gipangutana kung makahatag ba usab ang siyudad og hinabang pinansyal ngadto sa mga biktima, nagkanayon si Rama nga magdepende kini kung adunay igong kuwarta ang siyudad alang niini.
Dugang pa sa mayor nga nakighinabi na niya ang mga opisyal sa City Disaster Risk Reduction Management Office aron tan-awon ang posibilidad sa pagbisita sa lugar aron ang makahimo ang syudad og kaugalingong assessment kalabot sa tabang nga ihatag niini ngadto sa mga residente sa ang mga apektadong lugar.
Samtang , gikatakdang mopakatap ang kagamhanan sa dakbayan sa Lapu-Lapu sa Collapsed Structure Search & Rescue Team gikan sa Disaster Risk Reduction and Management Office (DRRMO) aron matabangan ang mga biktima sa linog sa probinsya sa Abra.
Sa usa ka social media post, gipaambit ni Lapu-Lapu City Mayor Ahong Chan nga makig-coordinate kini sa Office of Civil Defense (OCD)-7, alang sa deployment sa ilang DRRMO personnel.
