CEBU – Gihan-ay na sa dakbayan sa Talisay ang ilahang mga aktibidad alang sa usa ka buwan nga selebrasyon alang sa ilahang tradisyon ug kultura.
Matud ni Talisay City Councilor Lester Daan, ang chairman sa Social-Cultural Committee, nga tumong sa maong kalihokan nga mapakita sa mga Sugbuanon ang turismo sa syudad diin sentro sa kalihokan ang ilahang Halad Inasal Festival.
Sigon pa, importante usab ang paghan-ay sa ilahang mga aktibidad arun nga masayran ang kantidad sa pondo nga gikinahanglan alang sa maong aktibidad.
Una niini, gipasar sa konseho sa Talisay ang resolusyon nga giduso ni Konsehal Daan diin maghimo sa buwan sa Oktubre nga “Tourism and Culture Month” sa syudad.
Katuyoan sa maong kalihokan ang pagpabalik sa kalagsik sa ekonomiya sa syudad human nga mikuso-kuso ang COVID-19 pandemic lukop Sugbo.
