Gipahibalo ni National Food Authority (NFA) Administrator Larry Lacson ang dakong pagkunhod sa produksyon sa humay atol sa kinapungkayan sa ting-ani o wet harvest season.
Matod ni Lacson, nag-unang hinungdan niini ang pag-undang una sa ubang mag-uuma sa pagtanom tungod sa taas nga gasto sa produksyon nga miabot na sa P16 ngadto sa P17 matag kilo ilabi na sa mahal nga abono ingon man ang grabeng kadaot sa mga umahan tungod sa habagat ug sunod-sunod nga mga bagyo.
Naghulat pa karon ang ahensya sa opisyal nga datos gikan sa Philippine Statistics Authority (PSA) alang sa eksaktong porsyento sa pagkunhod.
Isip pagpangandam sa pagbalik sa pagtanom karong Enero, gipadali sa NFA ang pagtukod og dugang mga pasilidad sa pagpauga ug paggaling sa humay nga mahuman sa sunod tuig.
Miabang usab ang ahensya og 65 ka pribadong bodega nga nakapasaka sa kinatibuk-ang kapasidad sa pagtipig sa nasod ngadto sa usa ka milyon ka metriko tonelada, gawas pa sa mga bag-ong bodega nga giablihan sa Iloilo, Region 5, ug Region 4.
Sumala ni Lacson, dako kini og tabang aron mapalig-on ang ilang programa sa pagpalit og palay ug masiguro ang padayon nga suporta sa mga mag-uuma.
