TOLEDO, CEBU-Kumpirmado nga gilugos ang biktima nga si Sharmaine Flores kinsang nakaplagan nang walay kinabuhi sa Barangay Bunga, dakbayan sa Toledo.
Gipahibalo ni Police Lieutenant Colonel Manolo Salvatierra, ang hepe sa Toledo City PNP, nga basi sa resulta sa medico legal, nakita nga adunay ‘laceration’ sa kinatawo sa biktima diin nagpamatuod nga nahilabtan ang pagka-babaye niini.
Gawas pa niini, matud ni Salvatierra nga ‘manual strangulation’ o gitu-ok ang biktima hinungdan sa iyahang kamatayon.
Sa pagkakarun, gipaabot pa sa kapulisan ang resulta sa swab test nga ilahang gipahigayon alang sa dugang ebidensya nga ilahang gihuptan.
Hinuon, gitino ni Lt. Colonel Salvatierra nga wala pa nila gisirado ang imbestigasyon gumikan kay padayon pa ang ilahang pagpangita og mga ‘reliable witnesses’ diin iyahang giangkon nga sagad sa ilahang gihuptan karun pulos pa mga ‘circumstancial evidences’.
Kagahapong adlawa, Dominggo, Setyembre 3, gihatod sa katapusang pahulayan ang 17-anyos nga si Sharmaine, diin singgit sa gihapon sa inahan ang hustisya alang sa iyahang anak.
Gipasalig sa kapulisan sa Toledo nga ilahang ihatag ang hustisya sa pamilyang Flores sa linuog nga pagpatay sa naasoy nga dalaga.
