CEBU CITY– Nahisama na matud pa sa ghost town ang Davao City human nga wala na’y mga mall ug tindahan nga nangabli subay sa sunod-sunod nga 6.6 ug 6.5 magnitude nga linog nga mitay-og sa Mindanao area niini lang semanaha.
Kini ang gisaysay ni Iris Shene Inanoria, usa sa mga residente sa Davao City, nga nahinabi sa Bombo Radyo Cebu.
Matud ni Inanoria nga padayon pa gihapon sila nga nakasinati og aftershocks. Gani naa nalang sila sa hawan nga dalan nag-istar gumikan kay nahadlok na sila musulod sa ilang pinuy-anan basin unya og mu-collapse kini tungod kay kusog sa gihapon ang mga aftershocks.
Apan gi-angkon hinoon ni Inanoria na aduna nay nakaabot ug nakadawat na sila og mga relief good human ma-paralyze na matud pa ang mga tindahan sa ilang lugar.
Lig-on hinoon si Inanoria tungod kay taliwa sa nga nahitabo, giisip niini nga pagsuway lamang ang tanan sa Ginoo.
Nanawagan nalang kini sa iyang kabanay sa Cebu nga dili na mabalaka tungod kay maayo na man usab ang ilang kahimtang karon. (Lahvi Quiñones)
