Gisugdan ang ika-20 nga adlaw sa impeachment trial batok kang Vice President Sara Duterte pinaagi sa pag-ampo nga gipangulohan ni Senator-Judge Juan Miguel “Migz” Zubiri.
Sa iyang pag-ampo, gihangyo ni Zubiri nga ang proceedings dili mahimong hinungdan sa pagkabahinbahin sa katawhang Pilipino, kondili mahimong dalan padulong sa panaghiusa, maayong panggobyerno ug matinud-anong pagserbisyo sa nasud.
Nikabat sa 15 ka senator-judges ang mitambong sa pagsugod sa hearing karong adlawa.
Samtang nagpadayon ang proceedings, gipresentar sa House prosecution panel ngadto sa Impeachment Court ang ilang saksi nga si Colonel Manaros Boransing II.
Gisugdan ni House private prosecutor Atty. Reynaldo “Rey” Robles ang direct examination kang Boransing.
Giklaro ni Boransing nga wala makadawat og pondo ang ilang yunit gikan sa Department of Education (DepEd) ug Office of the Vice President (OVP) alang sa ilang mga programa.
Sumala niya, ang pondo alang sa Youth Leadership Summit (YLS) ug Information, Education and Communication (IEC) campaign naggikan sa lain-laing local government units (LGUs).
Gilauman nga ang testimonya ni Boransing makatabang sa prosecution sa pagpatin-aw sa mga alegasyon nga ilang gipasaka batok kang Vice President Duterte.
