CENTRAL VISAYAS- Niabot na sa 188 ang ihap sa mga tawo nga namatay tungod sa Bagyong Tino sumala sa Office of Civil Defense (OCD) karung adlawa Biyernes.
Sumala sa ahensya, 33 ang nakalas sa Negros Island Region, samtang 140 ang anaa sa Region 7.
Samtang, aduna pa’y 135 ka mga tawo ang nawala, busa ang mga operasyon sa
search, rescue, ug retrieval operations, nagpadayon, ilabi na sa Negros Island Region ug Region 7.
Sa detalye, anaa sa 56 ang nawala sa Negros Island Region ug 79 sa Region 7.
Samtang, sumala sa National Disaster Risk Reduction and Management Council (NDRRMC), anaa sa 96 ka tawo ang nasamdan.
Moabot usab sa 2,258,782 ka tawo o anaa sa 635,565 ka pamilya ang naapektuhan, diin 397,634 ang temporaryong gipabakwit.
Naguba usab ang anaa sa 9,585 ka mga balay ug anaa sa 9,321 ang partially damaged, niini nga ihap, 264 ang hingpit nga naguba.
Gikataho ang kadaot sa agrikultura nga nagkantidad og P10,615,193, samtang anaa sa P6,330,000 ang nadaot sa imprastraktura.
Gumikan sa bagyo, dili maagian ang mga dalan ug 10 ka tulay.
Nabalik na ang suplay sa kuryente sa 58 sa 162 ka apektadong lugar, ug ang komunikasyon sa 5 sa 22 ka lugar.
Apan, aduna gihapoy problema sa suplay sa tubig sa 11 ka lugar.
Gisuspinde ang mga klase sa 707 ka lugar ug ang trabaho sa 483 ka lugar.
Nakaapod-apod na ang NDRRMC og tabang nga nagkantidad og P111,123,620 sa mga biktima.
Sumala ni President Ferdinand “Bongbong” Marcos Jr., iyang giaprobahan ang rekomendasyon nga magdeklara og state of national calamity tungod sa kadaot nga gipahinabo sa Bagyong Tino.
