Adunay 73 ka mga indibidwal nga natala sa Department of Health -Central Visayas (DOH-7) nga biktima sa pabuto gikan niadtong petsa 21 sa Disyembre 2025 hangtod na sa petsa 1 sa Enero 2026.
Subay sa monitoring sa DOH-7, kini nagagikan sa Sentinel ug Non-sentinel Hospitals nga naglangkob sa naasoyng petsa.
Matod pa, sa 73 ka mga indibidwal, 27 niini ang nagagikan sa Lalawigan sa Sugbo, 20 sa Dakbayan sa Sugbo, 16 sa Dakbayan sa Lapu-Lapu, 1 sa Dakbayan sa Mandaue, ug 9 sa Probinsya sa Bohol.
Giklaro usab sa maong buhatan nga walay insidenteng natala nga adunay nakatulon og pabuto o ba kaha naigo sa mga saag nga bala o “stray bullet.”
Gidugang pa nga kasagaran sa mga naangol kay tungod sa mga pabuto sama sa Kwitis, ug uban pang mga unidentified nga mga klase sa pabuto.
Subay niini, sa maong numero nga gipagawas sa buhatan, mas kunhod kini og 8 porsyento kung itandi niadtong Disyembre 21, 2024- Enero 1, 2025.
