CEBU CITY-Gihingusgan sa Department of the Interior and Local Government (DILG) kauban ang Commission on Elections (Comelec) ang pakigbatok sa vote buying ug vote selling, subay sa nagkaduol nga Barangay ug Sangguniang Kabataan Elections (BSKE) sa Oktubre 30.
Sama sa gisaysay sa Omnibus Election Code (OEC), ang pagpamalit og boto ug pagbaligya sa boto nagtumong sa pagtanyag salapi o bisan unsang butang nga adunay kantidad aron maaghat si bisan kinsa nga mobotar o batok sa bisan kinsa nga kandidato.
Subay niini, nipirma si DILG Secretary Benhur Abalos ug Comelec Chairman George Erwin Garcia og Memorandum of Agreement (MOA) alang sa pagtinabangay sa ilahang mga buhatan uban sa ubang mga ahensya sa gobyerno, citizens’ arm, ug uban pang stakeholders aron masiguro ang matinud-anon ug malinawon nga pagpahigayon sa BSKE.
Ubos sa MOA, ang Comelec ug DILG magtinabangay sa pagbansay sa DILG ug mga kawani sa lokal nga kagamhanan sa pag-ila ug paghipos sa mga ebidensya sa bisan unsang kalapasan sa eleksyon.
Sa pikas bahin, ang deployment sa BSKE 2023 official ballots ug uban pang porma para sa Sugbo gikatakdang ipahigayon karong Oktubre 15.
Sa Oktubre 25, ang Comelec-7 mopahigayon usab og ceremonial deployment sa mga personahe gikan sa Philippine National Police, Philippine Coast Guard, Armed Forces of the Philippines, ug uban pang mga buhatan.
Samtang, ang acting regional election director sa Comelec-7 nga si Director Lionel Marco Castillano nagkanayon nga ang aktuwal nga deployment sa mga personnel magdepende sa PNP, kay posibleng ipadala sila sa ilang tagsa-tagsa ka assignment pipila ka adlaw sa dili pa ang Oktubre 30.
Kabahin sa pagpangandam alang sa BSKE, gidugang niini nga hapit na kini mahuman ug naglibot-libot na siya sa rehiyon aron sa pagpaminaw sa mga kabalaka sa lainlaing mga opisyal sa eleksyon ug matino kung unsa ang buhaton sa rehiyonal nga opisina sa Comelec aron matabangan sila.
