Gipahugtan sa Department of Education (DepEd) Region 7 ang seguridad sa mga eskwelahan sa Central Visayas aron maprotektahan ang mga estudyante ug magtutudlo, taliwala sa pagtaas sa mga insidente sa krimen nga natala sulod sa mga tunghaan.
Ang maong lakang misubay sa direktiba sa DepEd central office nga mas palig-onon ang seguridad ug ipatuman ang mas istriktong safety measures human sa nahitabong pagpamusil sa Santa Rosa Integrated School sa Nueva Ecija.
Sa pakighinabi sa Bombo News Team, si DepEd-VII Regional Director Dr. Salustiano Jimenez mitumbok nga gigamit sa rehiyon ang “location situation-based approach” aron matino ang angay nga solusyon base sa kahimtang sa matag lugar.
Gimandoan na sa opisyal ang mga administrador sa tanang tunghaan sa rehiyon nga pahugtan ang seguridad ug masiguro ang kahimtang sa kaluwasan sa mga magtutudlo ug estudyante.
Lakip sa mga rekomendasyon mao ang pagpadayon sa presensya sa mga security guard ug pagkoordinar sa mga lokal nga panggamhanan (LGUs) aron matabangan sa pagbutang og mga tanod sa eskwelahan.
Gisugyot usab ang pagpalig-on sa police visibility duol sa mga tunghaan aron malikayan ang bisan unsang dautang huna-huna sa kabatan-onan o mga estudyante.
Bisan pa niini, gipasabot ni Jimenez nga anaa gihapon ang palisiya sa DepEd nga nagdili sa mga sakop sa kapulisan nga mosulod sa sulod sa mga eskwelahan, aron mapabilin ang malinawon ug luwas nga palibot sa pagkat-on.
Gipasalig sa mga opisyal sa Department of Education Region VII (DepEd-7) sa mga ginikanan nga padayon nilang ginapaningkamotan ang paghatag og luwas nga palibot alang sa tanang tinun-anan sulod sa mga tunghaan.
Gihangyo usab ang kooperasyon sa mga ginikanan o mga guardian pinaagi sa paghatag og igong panahon ug pag-atiman sa ilang mga anak.
Gidasig ang aktibong partisipasyon sa mga Parent-Teacher Association (PTA) aron, kung adunay oportunidad, makabisita sa tunghaan ug makapahigayon og roving, nga adunay tinuyo nga dili makasamok sa mga klase.
Ang maong inisyatiba gipatuman aron mas mapalapdan ang pagmonitor sa kahimtang sa mga estudyante, ilabi na kadtong nakasinati og insidente sa bullying sulod sa tunghaan.
