Nanawagan ang Department of Education (DepEd) sa Philippine National Police (PNP) ug uban pang ahensya sa pagpatuman sa balaod nga hugtan ang pagpatuman sa pagpanag-iya og armas human ang usa ka 9 anyos nga estudyante sa General Santos City naangol sa dihang aksidente nga mibuto ang usa ka .38 caliber revolver nga iyang gidulaan uban sa iyang higala.
Si Education Secretary Sonny Angara miingon nga ang bag-ohay nga mga insidente nga naglambigit sa mga batan-on nga naggunit og armas makaalarma na.
Gipasiugda sa Kalihim nga angay lang nga hugtan ang pagpatuman sa responsable nga pagpanag-iya og armas, lakip ang mas estrikto nga background check sa mga lisensyado nga armas, regular nga inspeksyon sa hustong pagtipig sa mga armas, ug mas agresibo nga kampanya batok sa ilegal nga mga tiggamit og armas.
Bisan tuod ang PNP mao ang pangunang ahensya nga nagdumala sa pag-regulate sa mga armas ug pag-isyu og mga permit, si Angara miingon nga ang papel sa mga ginikanan ug mga tigbantay importante usab sa hustong pagtudlo sa hustong kaluwasan sa paggamit og armas sa ilang mga anak.
Miingon siya nga ang mga bata kinahanglan tudloan nga dili maggunit og armas, sabton ang mga peligro niini, ug ireport dayon sa usa ka hamtong kung makakita sila og armas.
Sa samang higayon, gisubli sa DepEd ang estrikto nga pagpatuman sa zero-tolerance policy batok sa pagdala og mga pusil, bala, kutsilyo, ug uban pang eksplosibo sulod sa mga eskwelahan ug sa tanang kalihokan sa eskwelahan, subay sa Guidelines on Ensuring a Safe and Motivating Learning Environment.
Gimandoan usab ang mga eskwelahan nga hugtan ang mga protocol sa seguridad, mopahigayon og mga inspeksyon, regular nga risk assessment, ug ireport dayon sa PNP ang bisan unsang ilegal nga armas nga madiskobrehan sa mga estudyante.
