Gihimakak ni Department of Foreign Affairs Undersecretary Eduardo de Vega ang taho nga nikatap sa social media nga ang mga Pilipino nga unang nasikop sa Qatar mahimong makagawas kon makapiyansa sila og P1 milyon.
Gitataw ni De Vega nga dili kini tinuod tungod kay walay piyansa ang nahimong kalapasan sa mga dinakpan nga Pinoy.
Gipasabot sa opisyal nga ang mahitabo lang kay mahimo silang buhian o mapasakaan og kaso, ingon man mapabilin sa mga detention facility sa dugay nga panahon.
Gipasiugda sa opisyalnga gihimo sa gobyerno ang tanan aron matabangan ang 17 nga natanggong pa lakip ang pagpadala sa mga abogado ug mga labor attaché.
Dugang ni de Vega, ang mga dinakpan nga mga Pilipino mahimong mag-atubang og hangtod sa tulo ka tuig nga pagkapriso kung ipadayon sa gobyerno sa Qatar ang pagpasaka og kaso batok kanila.
Kahinumduman, una silang gidakop tungod sa giingong pagpahigayon og political rally sa nasud, dungan sa ika-80 nga adlawng natawhan ni kanhi Presidente Rodrigo Duterte, kinsa kasamtangang gitanggong sa International Criminal Court.
