CEBU CITY- Gihangop sa mga Diehard Duterte Supporters (DDS) sa Sugbo ang anunsyo ni VP Sara Duterte nga modagan pagka-presidente sa 2028.
Sumala ni Jun Abines, lider sa Solid DDS sa Cebu, sa pakighinabi sa Bombo News Team, andam na sila sa pag-mobilisa sa grassroots hangtod sa barangay level, bisan sayo pa ang diskusyon sa eleksyon 2028.
Matud pa sa grupo, kini tungod kay nagtuo sila nga ang mga Duterte ang pinakakusgan nga mahimong sunod nga presidente sa nasud.
Gani, gihatagan niini og gibug-aton nga bisan pa wala pa ang opisyal nga pag-anunsyo gikan kang VP Duterte, klaro na ang desisyon sa ilang kampo nga suportahan siya.
Kana gumikan, kay alang kanila, igo na nga adunay lider nga masaligan aron masugdan ang pag-organisa sa mga tagasuporta sa komunidad.
Giangkon usab sa mga DDS nga ang sunod-sunod nga pag-atake, impeachment, ug black propaganda batok kang Duterte giisip nilang pagsulay sa iyang panan-aw sa pagkapresidente.
Samtang, gibatikos usab sa grupo ang kakulang sa proyekto ug walay klarong kalampusan sa administrasyon ni Ferdinand Marcos Jr., ilabi na sa imprastruktura sama sa kalsada, tulay, ug pantalan.
Matud pa nila, mas daghan ang politika ug bangayan kaysa konkreto nga kausaban sa kinabuhi sa Pilipino.
Gi-awhag usab sa grupo ang publiko nga klarohon na karon pa lang kung kinsa ang ilang suportahan, gikan sa mga kongresista, mayor, gobernador, hangtod senador, aron masayran kinsa ang tinuod nga kauban sa ilang baruganan alang sa kausaban sa Pilipinas.
