LAPU-LAPU CITY,CEBU- Giabiabi sa Dakbayan sa Lapu-Lapu si Secretary Juanito Victor C. Remulla sa Department of the Interior and Local Government (DILG) atol sa iyang pagbisita sa 911 Command Center sa Bureau of Fire Protection Station sa Barangay Poblacion ug sa Korean Help Desk sa Liberty Shrine sa Barangay Mactan gahapong adlawa, Abril 19.
Matod pa ni Lapu-Lapu City Mayor Cindi King Chan, kini nga pagbisita sa kalihim nagpakita sa ilahang padayon nga pasalig sa pagpahiuyon sa lokal nga mga inisyatibo sa Safer Cities Program sa DILG, ilabina sa pagpalig-on sa mga sistema sa pagtubag sa emerhensya ug pagpalambo sa mga lakang sa seguridad sa mga lugar sa turismo.
Dugang pa, isip usa ka nanguna nga sentro sa turismo sa Kabisay-an, gikabutyag sa mayor nga ilang gituman ang ilahang responsibilidad sa pagsiguro nga ang matag bisita mobati nga luwas, protektado, ug giabiabi, nga giila nga ang seguridad hinungdanon sa pagpadayon sa pagsalig ug pagtubo sa maong siyudad.
Atol sa programa, gipasiugda niini ang padayon nga mga paningkamot sama sa pagtukod og mga Korean Help Desk ug ang estratehikong pag-deploy sa mga police outpost sa mga nag-unang destinasyon sa turismo, nga nagpalig-on sa giambitan nga tumong sa pagtukod og mas luwas, mas segurado, ug globally connected nga Lapu-Lapu City alang sa tanan.
Samtang ang Lapu-Lapu City Police Office (LCPO) adunay mahinungdanong papel usab sa maong kalihokan, nga nagpasiugda sa pasalig sa pagmintinar sa kalinaw ug kahusay, labi na sa mga dagkong lugar sa turismo, diin pinaagi sa makita nga presensya sa pulisya, koordinado nga mga operasyon, ug dali nga mga kapabilidad sa pagtubag.
Lakip sa nitambong sa maong kalihokan mao sila si His Excellency Lee Sang-Hwa, Congressman Junard “Ahong” Chan, Governor Pamela S. Baricuatro, Cebu City Mayor Nestor Archival, Mandaue City Mayor Jonkie Ouano, Police Brigadier General Arnold E. Abad sa PRO7, ug PBGEN Redrico Maranan, ug uban pa.
