CEBU CITY-Nabuak ang kalinaw sa seremonyas sa pag-isa sa watawat sa Cebu City Hall human mitunga si Dismissed Cebu City Mayor Michael “Mike” Rama ug mga dumadapig niini sa padayon niining sugyot nga siya ang Mayor sa dakbayan sa Sugbo kagahapong adlawa sa Lunes, Disyembre 2, 2024.
Giunhan kini sa dihang miapil sa senemahang Flag Ceremony si Rama ug sa iyang anak nga si Atty. Mikel Rama uban ni kanhi City Administrator Atty. Collin Rosell diin mipwesto tupad ni Cebu City Mayor Raymond Alvin Garcia.
Mi-walkout pa sa si Rama sa higayong gi-acknowledge kini ni Mayor Garcia sa speech atol sa maong flag ceremony diin siya gitawag nga “Former Mayor”.
Human sa maong seremonyas kay mipahigayon og press conference si Rama ug kaubanan ilabi na sa iyang mga dumadapig diin giangkon niini nga dili na bag-o sa kagamhanang dakbayan ang adunay miyembro sa pamilya nga trabahante sa City Hall lakip na ang asawa, bana, anak, ug bisan mga ugangan.
Misamot pa ang tensyon dihang misuway og sulod si Rama sa gikandadohang Ground Floor – Mayor’s Office si Rama dayon gikatahong gi-clampan ang iyang sakyanan sa CCTO sa entrada sa Executive Building.
Hinungdan nga nakapa-ulbo kini sa mga dumadapig sa kanhi mayor og nakapa-aghat sa kapulisan sa pagdeploy sa Civil Disturbance Management (riot police) aron sa pagmintenar sa peace and order sa maong dapit.
Apan human sa maong mga interaksyon, mihawa na si Rama sa dapit uban sa iyang kaubanan ug mga dumadapig.
Samtang sa pikas bahin atol sa pakighinabi ni Mayor Garcia sa mga sakop sa media, diin giklaro niini nga welcome ra si Rama musulod sa City Hall apan dapat dili kini makabalda sa trabaho sa kagamhanang dakbayan.
