CEBU CITY- Posibling mag-atubang na usab og laing kaso si Dismissed Cebu City Mayor Michael Rama tungod sa kapakyas sa pag-uli sa sakyanan nga gipanag-iya sa dakbayan.
Kasong ‘carnapping’ ang posibling atubangon sa kanhi Mayor human kini mapakyas sa pagtuman sa mando gikan sa Cebu City Legal Office (CLO) nga iuli ang government-issued vehicle nga adunay deadline niadtong Biyernes, Pebrero 21, 2025.
Kahinumduman nga miluwat og final demand letter ang CLO niadtong Pebrero 19 kabahin sa pagpauli sa sakyanang gipanag-iya sa dakbayan tungod pipila ka buwan na kining anaa gihapon sa posesyon sa gikataktak nga mayor.
Ang sakyanan matod pa kay usa ka bulletproofed nga Toyota Hiace Super Grandia (van-type vehicle) diin subay sa final demand letter kay gihatagan lang og 24 sa pagsunod sa maong mando apan napakyas ang kanhi-mayor sa pagtuman niini.
Gani mibisita pa kini sa City Hall kagahapong adlawa sab aron unta areglohon sa CLO ang maong isyu kay matod pa niya “mayor daw gihapon siya” sa dakbayan.
Apan bisan paman sa hawd nga pagsuroy-suroy ni Rama sa City Hall, mipahayag sa iyang bahin si Cebu City Mayor Raymond Alvin Garcia nga kung higaong dili mapatuman ang lagda sa balaod sa dili paggamit sa personal nga interes ang mga butang nga gipanag-iya sa kagamhanang kay magpasaka kini og mga kasong sibil ug kriminal batok sa kanhi-mayor nga kaniadto iyang kaalyado.
