Giklaro ni Defense Secretary Gilberto “Gibo” Teodoro Jr. ang iyang pamahayag bahin sa mga opisyal sa gobyerno nga dili mosuporta sa baruganan sa nasud sa West Philippine Sea (WPS).
Matod ni Teodoro, dili mapugos ang usa ka opisyal sa pag-resign tungod lang sa iyang personal nga opinyon o gituohan.
Kinahanglan adunay paglapas sa balaod o regulasyon aron adunay basehan sa maong aksyon.
Gipasabot niya nga ang polisiya sa WPS nakabase sa Administrative Order No. 29, series of 2012, nga nagtakda sa mga maritime area sa kasadpang bahin sa Pilipinas isip West Philippine Sea.
Sumala sa kalihim, nanumpa ang tanang opisyal sa gobyerno sa pagpanalipod ug pagdepensa sa Konstitusyon ug mga balaod sa nasud.
Kung dili sila mouyon sa usa ka polisiya, mahimo nilang ipasaka ang isyu sa korte o mosunod sa balaod samtang wala pa kini mausab.
Apan kung supak kini sa ilang konsensya, matod ni Teodoro, mahimo nilang pilion ang pag-resign.
Gipasiugda usab niya ang kamahinungdanon sa maong isyu samtang ang Pilipinas nagpadayon sa proseso pinaagi sa Department of Foreign Affairs (DFA) alang sa extended continental shelf claim nga naglakip sa mga katubigan duol sa Bajo de Masinloc o Panatag Shoal.
Gisaway usab ni Teodoro ang mga report ug headlines nga iyang giingong nagmaniobra sa iyang pahayag, ug giawhag ang publiko nga basahon ang tibuok konteksto aron malikayan ang sayop nga impormasyon.
