CENTRAL VISAYAS: Nagpahimangno ang Department of Health-7 sa katawhan, sa tumang kainit nga masinati nga adunay puruhan nga mamahimo nga peligro sa kahimsog sa kalawasan.
Tungod niini, ang DOH- 7 nipasaka sa alarma sa pagsaka sa temperatura, hinungdan nga gi-awhag nila ang publiko nga magmatngon aron malikayan ang mga sakit nga nalambigit sa kainit.
Tungod sa mga epekto sa tumang kainit ug sa El Niño, ang temperatura nakaabot sa taas nga rekord, ilabi na karong mga bulan sa ting-init. Ang dugay nga pagladlad sa grabe nga kainit, posibleng makahatag og peligro sa usa ka inibidwal.
Sumala pa sa DOH, ang mga sintomas nga adunay balatian ang indibidwal nga adunay kalimbigitan sa pagladlad sa kainit, pipila niini ang dehydration, digestive issues, hubak, impeksyon, ug uban pang nagkalain-laing komplikasyon sa kalawasan.
Dugang niana, ang mga trabahante nga naladlad sa init mao ang adunay taas nga higayon nga mag-atubang sa usa ka dako nga risgo sa kadaot sa ilang panglawas.
Ang taas ug grabe nga kainit makaapekto usab sa paglambo sa panghunahuna sa mga bata, nga mosangpot sa usa ka porsyento nga pagkunhod sa pagkat-on alang sa matag 0.56°C nga pagtaas sa temperatura sa tibuok tuig sa pagtungha.
Busa, ang Local Disaster Risk Reduction and Management in Health (DRRMH) Managers ug focal personnel, magpahigayon ug padayon nga pagmonitor, maghatag ug Rapid Health Assessment ug tukma nga health emergency response nga mga kalihokan sa mga kaso sa posibleng mga panghitabo sa panahon sa ting-init. ( BOMBO Irene Ardiente)
