Naka code alert ang buhatan sa Department of Health-Central Visayas sugod kagahapong adlawa Enero 6, ngadto na sa Enero 19, 2026, aron masiguro ang kaandam sa mga medical personnel, equipment og mga pasilidad aron mahatagag pagtagad ang kakulian sa panglawas may kalabutan sa dagkong mga panagtapok sa publiko.
Aktibo usab nga nagmonitor ang Department of Health Central Visayas Center for Health Development (DOH Central Visayas CHD) Regional Emergency Operations Center, nga gipangulohan sa Regional Health Emergency Management Section (RHEMS), sa tanang insidente nga may kalabutan sa panglawas uban sa hugot nga koordinasyon sa mga LGU Disaster Risk Reduction and Management for Health (DRRM-H) Coordinators ug mga partner agencies aron masiguro ang paspas ug koordinado nga tubag.
Gipakatap na usab ang mga medical teams og mga health stations sa mga ruta sa Sinulog aron maghatag dayon og medikal nga tabang, gikan sa basic first aid hangtod sa emergency care.
Lakip usab nga naka-standby ang mga nagkadaiyang ambulansya aron masiguro ang dali nga pagdala sa mga pasyente ug pagpadayon sa pag-atiman.
Andam na usab ang upat (4) ka DOH Hospitals sulod sa probinsya sa Sugbo, uban sa laing LGU ug pribadong mga health facility sa pag-accommodate sa mga pasyente nga nanginahanglan og daling medical management sa tibuok kasaulugan.
Mipahinumdom usab ang buhatan sa publiko nga unahon ang ilang panglawas ug kaluwasan pinaagi sa pagpabiling hydrated, pag-inom og mga maintenance nga tambal ilabi na alang sa mga adunay hypertension o uban pang mga sakit nga kroniko, pagsul-ob og gaan ug komportable nga mga sinina, paglikay sa dugay nga pagkabwad sa kainit, ug pagsunod sa tanan nga mga tambag sa kaluwasan.
Samtang gitambagan usab katong adunay gipamati sa kalawasan nga magpabilin nalang sa balay.
