CENTRAL VISAYAS-Naka-code white na ang buhatan sa Department of Health 7 diin kini nagpasabot nga andam na sila sa bisan unsang emerhensiya subay sa nagkaduol nga pasko ug bag-ong tuig.
Mao kini ang gipaambit ni Dr. Shelbay G. Blanco, DOH 7 Medical Officer VI nga ang tanang pasilidad sa panglawas kay naka-alerto, ingon man ang mga doctor ug staffs nga naka-standby sugod niadtong Disyembre 16 ug molungtad kini hangtud Enero 6 sa sunod tuig.
Kahinumduman niadtong Disyembre 21, 2023 ngadto na sa Enero 7, 2024 kay nakatala og 83 ka kaso sa fireworks related injuries ngadto sa disease reporting units.
Hinungdan nga nipasidaan ang buhatan sa DOH 7 nga magbinantayon ug mag-amping sa himsog nga panglawas ning yuletide season.
Gihimug-atan usab ni Dr. Blanco nga hatagan og pagpasiugda ang gitawag nga ‘healthy handaan’, ignon man ang pag-awhag usab niini sa pagpahugot sa mga kampanya batok sa mga pabuto tungod kay makadaot kini sa panglawas ug kinaiyahan.
Subay kini sa mga pagkaon nga manggawas panahon sa pasko, hilabi na ang pagdisiplina sa saktong diet sa mga adunay kakulian sa panglawas sama sa highblood, diabetes, arthritis nga kinahanglang likayan.
Gidasig usab niini nga kung mahimo mogamit og mga alternatibong pamaagi sa pagsaba-saba alang sa pagsugat sa mga umaabot nga kalihokan aron hingpit nga makab-ot ang kahapsay ug kalinaw sa pagsugat sa bag-ong tuig.
