CEBU CITY — Giklaro sa Department of Health (DOH)-7 ang report gikan sa Central Office kabahin sa mga pasyente gikan sa Sugbo kinsang gikatahong nataptan sa UK variant sa COVID-19.
Sa pagpakighinabi sa Bombo Radyo ngadto ni DOH-7 Spokesperson Dr. Mary Jean Lorreche, nagkanayon kini nga nagpadala sila og 10 ka mga positive swab samples ngadto sa Philippine Genomic Center (PGC) niadtong Disyembre ug usa niini ang natakdan sa B.1.1.7 variant sa coronavirus.
Kini mao ang usa ka returning OFW gikan sa Talisay City apan naayo kini ug na-discharge sa tambalanan human nga daling gi-atiman sa mga tinugyanan sa panglawas.
Samtang ang laing pasyente nga gikatahong lumad nga taga-Liloan wala nakauli sa iyang hometown ug na-detect kini sa maong mas makapanakod nga variant sa dihang nagpa-test kini sa Sta. Ana, Manila niadtong Enero 17.
Matud usab ni Lorreche nga kanunayon sa buhatan ang biosurveillance sa mga natakdan sa COVID-19 aron makahimo og dinaliang mga aksyon.
Kini pinaagi sa kanunay nga pagpadala og mga positive swab samples sa PGC aron ipaubos sa genome sequencing.
Molanat ngadto sa duha ka semana ang maong proseso usa pa masuta kung nagpositibo ba ang pasyente sa laing matang sa coronavirus variant.
Hinungdan nga mitambag ang DOH-7 sa publiko nga mosunod sa lagda sa kwarantina sanglit natural ang mutation o pagbag-o sa hulagway sa virus.
