Nunot sa mga taho nga mga kaso sa MPOX (Monkeypox), ang buhatan sa Department of Health Central Visayas Center for Health Development (DOH Central Visayas CHD), nagpasiugda kini sa usa ka mahinungdanon sa padayon nga pagbinantayon ug hugot nga pagsunod sa mga protocol sa panglawas aron malikayan ang pagkaylap sa maong virus.
Nasayran nga ang MPOX usa ka makatakod nga sakit nga gipahinabo sa virus sa monkeypox, nga kasagarang mapasa pinaagi sa suod nga kontak sa usa ka makatakod nga tawo.
Nalakip niini sa pagsulti, pagginhawa sa duol, paghalok, paghikap, paggakos, o pag-apil sa sekswal nga kalihokan.
Natataw usab sa DOH ang mga kasagarang mga sintomas sa MPOX, diin lakip niini ang skin rash o mucosal lesions nga kasagarang molungtad tali sa 2 ngadto sa 4 ka semana, kasagaran inubanan sa hilanat, labad sa ulo, sakit sa kaunuran, sakit sa likod, ubos nga kusog, ug paghubag sa mga lymph node.
Busa aduna silay pipila ka mga mahinungdanon nga aksyon aron malikayan kini, usa niini kay ang pag-praktis sa kanunay nga paghugas sa kamot gamit ang sabon ug tubig o alcohol-based nga hand sanitizer, pag-obserbar sa husto nga pamatasan sa pagginhawa pinaagi sa pagtabon sa baba ug ilong kung ubo, ug likayan ang suod nga kontak sa mga indibidwal nga nagpakita mga sintomas sa MPOX.
Agig tubag sa kasamtangan nga sitwasyon, ang DOH Central Visayas CHD mipataas sa ilang paningkamot sa pagpaniid ug nag-awhag sa publiko nga magpabiling aktibo sa pag-obserbar sa girekomendar nga mga lakang sa panglawas.
Nanawagan usab ang maong buhatan sa mga indibidwal nga nakasinati og mga sintomas nga nagsugyot sa MPOX, nga magpakonsulta medikal sa labing duol nga health center. | Bombo Irene Ardiente
